అక్రమాస్తుల కేసులో గనుల శాఖ అసిస్టెంట్ డైరెక్టర్‌పై ఏసీబీ దాడులు - 8 చోట్ల సోదాలు.. రూ.3.06 కోట్లకు పైగా ఆస్తుల గుర్తింపు

 అక్రమాస్తుల కేసులో గనుల శాఖ అసిస్టెంట్ డైరెక్టర్‌పై ఏసీబీ దాడులు - 8 చోట్ల సోదాలు.. రూ.3.06 కోట్లకు పైగా ఆస్తుల గుర్తింపు

వరంగల్, ఆగస్టు 27: ఆదాయానికి మించిన ఆస్తులు కూడబెట్టారనే ఆరోపణలపై గనులు, భూగర్భ శాఖ అసిస్టెంట్ డైరెక్టర్, ప్రస్తుతం వరంగల్ డిప్యూటీ డైరెక్టర్‌గా పూర్తి అదనపు బాధ్యతలు నిర్వహిస్తున్న బోజ్జ జయ రాజుపై తెలంగాణ అవినీతి నిరోధక శాఖ (ఏసీబీ) కేసు నమోదు చేసింది.

ఏసీబీ వరంగల్ రేంజ్ అధికారులు బుధవారం నిందితుడికి, ఆయన బంధువులు, సన్నిహితులకు సంబంధించిన 8 ప్రాంతాల్లో ఏకకాలంలో సోదాలు నిర్వహించారు. ఈ తనిఖీల్లో భారీగా స్థిర, చరాస్తులు గుర్తించినట్లు ఏసీబీ విడుదల చేసిన ప్రకటనలో పేర్కొంది.

బోడుప్పల్‌లో జీ ప్లస్-2 భవనం, హైదరాబాద్‌లో ఫ్లాట్, కీసర, తుంగతుర్తి, తూప్రాన్, సూర్యాపేట తదితర ప్రాంతాల్లో ప్లాట్లు, 3.21 ఎకరాల వ్యవసాయ భూమి, నగదు, ఎల్‌ఐసీ, మ్యాక్స్ లైఫ్ పొదుపులు, పోస్టాఫీస్ సేవింగ్స్, బంగారు ఆభరణాలు, గృహోపకరణాలు, మూడు నాలుగు చక్రాల వాహనాలు, రెండు ద్విచక్ర వాహనాలు, బ్యాంకు ఖాతాల్లో నగదు ఉన్నట్లు అధికారులు వెల్లడించారు.

ఇప్పటివరకు గుర్తించిన ఆస్తుల మొత్తం విలువ రూ.3,06,53,177గా అంచనా వేసినట్లు తెలిపారు. స్థిరాస్తుల మార్కెట్ విలువ అధికారిక, డాక్యుమెంట్ విలువ కంటే మరింత ఎక్కువగా ఉండే అవకాశం ఉందని పేర్కొన్నారు.

దర్యాప్తులో భాగంగా నిందితుడి డ్రైవర్ సత్తునూరి యాదయ్య మొబైల్ ఫోన్‌లో లభించిన సమాచారం, బ్యాంకు లావాదేవీలను పరిశీలించినట్లు ఏసీబీ తెలిపింది. సుమారు రూ.24.80 లక్షలు పలు విడతలుగా డ్రైవర్ బ్యాంకు ఖాతా నుంచి నిందితుడి కుమార్తె ఖాతాకు బదిలీ అయినట్లు ప్రాథమికంగా గుర్తించారు. ఈ నగదు ఇసుక రవాణా, ఇతర కార్యకలాపాలకు సంబంధించిన వ్యక్తుల నుంచి సేకరించినదిగా ఆరోపణలు ఉన్నాయని, దీనిపై మరింత విచారణ కొనసాగుతోందని వెల్లడించారు.

నిందితుడిపై అవినీతి నిరోధక చట్టంలోని సంబంధిత సెక్షన్ల కింద కేసు నమోదు చేసి దర్యాప్తు కొనసాగిస్తున్నట్లు ఏసీబీ అధికారులు తెలిపారు.