*మట్టి వినాయక విగ్రహాలతో పర్యావరణ పరిరక్షణ - TGPCB ఆధ్వర్యంలో విద్యార్థులకు వర్క్షాప్*
*మట్టి వినాయక విగ్రహాలతో పర్యావరణ పరిరక్షణ - TGPCB ఆధ్వర్యంలో విద్యార్థులకు వర్క్షాప్*
*హైదరాబాద్, సెప్టెంబర్ 7:* తెలంగాణ కాలుష్య నియంత్రణ మండలి (TGPCB) ఆధ్వర్యంలో పర్యావరణహిత మట్టి వినాయక విగ్రహాల తయారీ, నిమజ్జనంపై అవగాహన వర్క్షాప్ సనత్నగర్లోని ప్రధాన కార్యాలయంలో నిర్వహించారు.
ఐదు పాఠశాలలకు చెందిన 108 మంది విద్యార్థులు ఈ వర్క్షాప్లో పాల్గొన్నారు. TGPCB మెంబర్ సెక్రటరీ జి. రవి ఈ కార్యక్రమాన్ని ప్రారంభించారు.
ఈ సందర్భంగా ఆయన మాట్లాడుతూ ప్లాస్టర్ ఆఫ్ పారిస్ (PoP) విగ్రహాలకు బదులు మట్టి వినాయక విగ్రహాలను వినియోగించాలని సూచించారు. మట్టి విగ్రహాలు నీటిలో సహజంగా కరిగిపోవడం వల్ల నీటి వనరుల కాలుష్యాన్ని తగ్గించవచ్చని తెలిపారు. విగ్రహాల నిమజ్జనాన్ని నిర్దేశించిన చెరువులు, సరస్సుల్లోనే చేపట్టాలని కోరారు. విద్యార్థులు ఈ అవగాహనను తల్లిదండ్రులు, సమాజానికి తెలియజేసి పర్యావరణహిత వినాయక చవితి సందేశాన్ని ప్రతి ఇంటికి తీసుకెళ్లాలని పిలుపునిచ్చారు.
*రాష్ట్రవ్యాప్తంగా విస్తృత ప్రచారం*
పర్యావరణహిత వినాయక చవితిపై TGPCB ఆటోల ద్వారా, పోస్టర్ల ద్వారా విస్తృత ప్రచారం చేపడుతోంది. రాష్ట్రవ్యాప్తంగా ఇప్పటివరకు 3.26 లక్షలకు పైగా మట్టి వినాయక విగ్రహాలను పంపిణీ చేసింది. జిల్లా కలెక్టరేట్లు, దేవాలయాలు, గుర్తించిన ప్రాంతాల్లో నోడల్ అధికారుల ద్వారా ఈ విగ్రహాలను ప్రజలకు అందుబాటులో ఉంచారు.
సెప్టెంబర్ 8 నుంచి CURE ప్రాంతంలోని 19 పాఠశాలల్లో (అందులో 10 ప్రభుత్వ పాఠశాలలు) మట్టి వినాయక విగ్రహాల తయారీపై వర్క్షాప్లు నిర్వహించనున్నారు. సుమారు 115 నుంచి 120 మంది విద్యార్థులు పాల్గొని ప్రాయోగిక శిక్షణ పొందనున్నారు.
వర్క్షాప్లో పాల్గొన్న విద్యార్థులకు ధ్రువపత్రాలు అందజేశారు.
ఈ కార్యక్రమంలో చీఫ్ ఎన్విరాన్మెంటల్ ఇంజనీర్ బి. రఘు, జాయింట్ చీఫ్ ఎన్విరాన్మెంటల్ ఇంజనీర్ కృపానంద్, సీనియర్ అడ్మినిస్ట్రేటివ్ మేనేజర్ శకుంతల, ఎన్విరాన్మెంటల్ సైంటిస్ట్ డా. జె. సుమతి, చీఫ్ అకౌంట్స్ ఆఫీసర్ తదితరులు పాల్గొన్నారు.
_- గుడాచారి.పేజ్_
Comments
Post a Comment