చిట్యాల చెక్‌పోస్టు వద్ద 60 గోవుల అక్రమ రవాణా భగ్నం

 

*చిట్యాల చెక్‌పోస్టు వద్ద 60 గోవుల అక్రమ రవాణా భగ్నం*  

*కబేళాకు తరలిస్తుండగా పోలీసుల మెరుపు దాడి*  

*లారీ డ్రైవర్ అదుపులో: ముఠా కోణంలో దర్యాప్తు*

*నల్లగొండ, గూఢచారి:* జిల్లాలోని చిట్యాల చెక్‌పోస్టు వద్ద పోలీసులు మెరుపు దాడి చేసి భారీ గో అక్రమ రవాణాను భగ్నం చేశారు. భద్రాద్రి కొత్తగూడెం నుంచి హైదరాబాద్‌లోని కబేళాకు తరలిస్తున్న సుమారు 60 గోవులను పోలీసులు పట్టుకున్నారు.

లారీలో కిక్కిరిసిన స్థితిలో గోవులను అత్యంత అమానవీయంగా తరలిస్తుండగా, చెక్‌పోస్టు వద్ద అనుమానం వచ్చిన పోలీసులు వాహనాన్ని ఆపి తనిఖీ చేశారు. లారీలో ఊపిరాడని స్థితిలో ఉన్న 60 గోవులను గుర్తించి డ్రైవర్‌ను వెంటనే అదుపులోకి తీసుకున్నారు.

గోవుల రవాణాకు సంబంధించిన ఎలాంటి అనుమతి పత్రాలు లేకపోవడంతో పోలీసులు కీలక వివరాలపై డ్రైవర్‌ను గట్టిగా విచారిస్తున్నారు. ఈ అక్రమ రవాణా వెనుక ఏదైనా ముఠా హస్తం ఉందా అనే కోణంలో పోలీసులు లోతుగా దర్యాప్తు చేస్తున్నారు.

పట్టుబడిన గోవులను సురక్షితంగా చింతపల్లి గోశాలకు తరలించి, వాటికి పశువైద్యులతో చికిత్స అందిస్తున్నారు. నిందితులపై కేసు నమోదు చేసి పూర్తి వివరాలు సేకరిస్తున్నామని చిట్యాల పోలీసులు తెలిపారు. ఈ దాడితో జిల్లాలో గో అక్రమ రవాణాదారుల గుండెల్లో రైళ్లు పరిగెడుతున్నాయి.

*- గూఢచారి ప్రతినిధి*