*తెలంగాణ అభివృద్ధికి కేంద్రం బాసట: రూ.9,500 కోట్ల ప్రాజెక్టులకు ప్రధాని మోదీ శ్రీకారం*

 *తెలంగాణ అభివృద్ధికి కేంద్రం బాసట: రూ.9,500 కోట్ల ప్రాజెక్టులకు ప్రధాని మోదీ శ్రీకారం*  

*హైటెక్స్‌లో ఘన స్వాగతం పలికిన సీఎం రేవంత్*  

*రాష్ట్ర ప్రగతికి డబుల్ ఇంజన్ సర్కార్ హామీ*

*హైదరాబాద్, గూఢచారి:* తెలంగాణ రాష్ట్ర సర్వతోముఖాభివృద్ధికి కేంద్ర ప్రభుత్వం పూర్తి సహకారం అందిస్తుందని ప్రధానమంత్రి నరేంద్ర మోదీ భరోసా ఇచ్చారు. భాగ్యనగరంలోని హైటెక్స్ హైదరాబాద్ ఇంటర్నేషనల్ కన్వెన్షన్ సెంటర్‌లో ఆదివారం జరిగిన కార్యక్రమంలో సుమారు రూ.9,500 కోట్ల విలువైన పలు అభివృద్ధి కార్యక్రమాలకు ప్రధాని శంకుస్థాపన, ప్రారంభోత్సవాలు చేశారు.

కార్యక్రమానికి విచ్చేసిన ప్రధాని మోదీకి ముఖ్యమంత్రి ఎ. రేవంత్ రెడ్డి ఘనంగా స్వాగతం పలికి శాలువాతో సత్కరించారు. అనంతరం సీఎం వెండి నంది విగ్రహాన్ని, కేంద్ర మంత్రి కిషన్ రెడ్డి శ్రీరాముడి ప్రతిమను ప్రధానికి బహూకరించారు.

*ప్రారంభించిన ప్రాజెక్టులు ఇవే*  

తెలంగాణలో మౌలిక సదుపాయాలు, పారిశ్రామికాభివృద్ధి, రవాణా, ఆరోగ్య రంగాల్లో విప్లవాత్మక మార్పులకు శ్రీకారం చుట్టేలా ప్రధాని పలు కీలక ప్రాజెక్టులను ప్రారంభించారు.

1. రూ.3,180 కోట్లతో చేపట్టే రహదారి పనులు

2. రూ.2,360 కోట్లతో ఇండస్ట్రియల్ స్మార్ట్ సిటీ

3. రూ.610 కోట్లతో ఇండియన్ ఆయిల్ కార్పొరేషన్ టెర్మినల్

4. రూ.1,243 కోట్లతో కాజీపేట-విజయవాడ ట్రిపులింగ్ పనులు

5. రూ.1,700 కోట్లతో నిర్మించిన పీఎం మిత్ర మెగా టెక్స్‌టైల్ పార్క్

6. రూ.300 కోట్లతో నిర్మించిన రైలు అండర్ రైల్ బైపాస్ లైన్

అంతేకాకుండా వరంగల్‌లో ప్రతిష్ఠాత్మకంగా ఏర్పాటుకానున్న పీఎం మిత్ర టెక్స్‌టైల్ పార్క్, జహీరాబాద్ పారిశ్రామిక ప్రాంత విస్తరణ, హైదరాబాద్-పనాజీ ఆర్థిక కారిడార్‌కు సంబంధించిన జాతీయ రహదారి పనులు, మల్కాపూర్‌లో ఇండియన్ ఆయిల్ గ్రీన్‌ఫీల్డ్ టెర్మినల్, హైటెక్‌సిటీలో ఆధునిక క్యాన్సర్ సూపర్ స్పెషాలిటీ ఆసుపత్రి వంటి కీలక ప్రాజెక్టులకు మోదీ శ్రీకారం చుట్టారు.

*దేశ అభివృద్ధిలో రాష్ట్రాల పాత్ర కీలకం: మోదీ*  

ఈ సందర్భంగా జరిగిన సభలో ప్రధాని మోదీ మాట్లాడుతూ దేశ అభివృద్ధిలో రాష్ట్రాల పాత్ర కీలకమని పేర్కొన్నారు. ఆధునిక మౌలిక సదుపాయాలు, పరిశ్రమలు, రహదారులు, ఆరోగ్య సేవల విస్తరణ ద్వారా తెలంగాణను మరింత అభివృద్ధి దిశగా తీసుకెళ్లాలని లక్ష్యంగా పెట్టుకున్నట్లు తెలిపారు. రాష్ట్ర అభివృద్ధికి కేంద్ర ప్రభుత్వం ఎల్లవేళలా అండగా ఉంటుందని హామీ ఇచ్చారు.

ఈ కార్యక్రమంలో సీఎం రేవంత్ రెడ్డి, డిప్యూటీ సీఎం భట్టి విక్రమార్క, కేంద్ర మంత్రులు, రాష్ట్ర మంత్రులు, ఎంపీలు, ఎమ్మెల్యేలు, ఉన్నతాధికారులు పాల్గొన్నారు.

*- గూఢచారి ప్రతినిధి*