కోతి పిల్లను ఆడిస్తూ భిక్షాటన చేస్తున్న కుటుంబానికి భారీగా జరిమానా
హైదరాబాదు:
కోతి పిల్లను ఆడిస్తూ భిక్షాటన చేస్తున్న కుటుంబానికి భారీగా జరిమానా పడింది. కోతిపిల్లకు విముక్తి లభించింది. ఉప్పల్‌ పోలీసుల కథనం ప్రకారం.. సిద్దిపేట జిల్లా, పొన్నాలకు చెందిన కోట పోచయ్య, పోచమ్మ దంపతులు కుమారుడు (12)తో కలిసి మల్లాపూర్‌లో ఉంటున్నారు. నగరంలో గాడిద పాలు అమ్ముకుంటూ జీవనం సాగిస్తున్నారు. వీళ్ల కుమారుడు మంగళవారం కోతి పిల్లను గొలుసుతో కట్టి ఆడిస్తూ భిక్షాటన చేస్తూ జంతువుల పట్ల దయగల సమాజం (కంపాశనేట్‌ సొసైటీ ఫర్‌ అనిమల్స్‌) ఫౌండర్‌, ఛైర్‌పర్సన్‌ నాగారం ప్రవళ్లిక కంటపడ్డాడు. కోతిపిల్లను గోలుసులతో బంధించడమే కాకుండా బాలుడు భిక్షాటన చేయడంపై ఆమె స్పందించారు. ఆ బాలుడిని, కోతిపిల్లను తీసుకొని ఉప్పల్‌ పోలీస్‌స్టేషన్‌కు తీసుకెళ్లారు. అనంతరం పోలీసులు బాలుడి తల్లిదండ్రులను కూడా స్టేషన్‌కు రప్పించి వారందరికీ కౌన్సెలింగ్‌ ఇప్పించారు. కోతిపిల్లతోపాటు బాలుడు, అతడి తల్లిదండ్రులను అటవీశాఖ అధికారులకు అప్పగించారు. విచారణ జరిపిన అధికారులు బాలుడి కుటుంబానికి రూ.10వేల జరిమానా విధించారు. కోతిపిల్లను చెంగిచర్ల అటవీ ప్రాంతంలో వదిలేశారు.
Comments
Post a Comment