*తోటి ఉద్యోగి కుటుంబానికి టీఎన్జీఓఎస్ నల్గొండ జిల్లా సంఘం అండ ఆర్థిక సహాయం అందజేత*

 

*తోటి ఉద్యోగి కుటుంబానికి టీఎన్జీఓఎస్ నల్గొండ జిల్లా సంఘం అండ ఆర్థిక సహాయం అందజేత*

నల్గొండ: చండూరు మండలం పుల్లెముల గ్రామానికి చెందిన పంచాయతీ కార్యదర్శి శ్రీపతి అంజయ్య  నిన్న సాయంత్రం మృతి చెందడం పట్ల నల్గొండ జిల్లా ఉద్యోగుల జేఏసీ చైర్మన్, టీఎన్జీఓఎస్ జిల్లా అధ్యక్షులు  నాగిళ్ల మురళి  జిల్లా కార్యదర్శి శేఖర్ రెడ్డి గారు తీవ్ర దిగ్భ్రాంతి వ్యక్తం చేశారు.

ఈ రోజు ఉదయం నల్గొండ జిల్లా ప్రభుత్వ ఆసుపత్రిలో అంజయ్య  పార్థివ దేహాన్ని సందర్శించి నివాళులర్పించారు. అనంతరం వారి కుటుంబ సభ్యులను పరామర్శించి ప్రగాఢ సానుభూతిని తెలియజేశారు. ఈ దుఃఖ సమయంలో కుటుంబానికి అండగా నిలుస్తూ టీఎన్జీఓఎస్ నల్గొండ జిల్లా సంఘం తరఫున రూ.10,000 ఆర్థిక సహాయాన్ని అందజేశారు.

ఉద్యోగుల కష్టసుఖాల్లో తోడుగా నిలవడమే సంఘం ప్రధాన లక్ష్యమని, బాధిత కుటుంబానికి అవసరమైన సహాయ సహకారాలు అందించేందుకు సంఘం ఎల్లప్పుడూ ముందుంటుందని ఈ సందర్భంగా నాయకులు పేర్కొన్నారు.

అదేవిధంగా, నల్గొండ జిల్లా కలెక్టర్  బి. చంద్రశేఖర్ రావు  అదనపు కలెక్టర్  ప్రేమ్ కరణ్ రెడ్డి  మానవతా దృక్పథంతో స్పందించి, మృతుడు శ్రీపతి అంజయ్య గారి కుటుంబానికి న్యాయం జరిగేలా తగిన చర్యలు తీసుకోవాలని టీఎన్జీఓఎస్ నాయకత్వం విజ్ఞప్తి చేసింది. కుటుంబ ఆర్థిక పరిస్థితిని దృష్టిలో ఉంచుకొని, ప్రభుత్వ నిబంధనలు, అర్హతల మేరకు కుటుంబ సభ్యుల్లో ఒకరికి అవుట్‌సోర్సింగ్ లేదా ఇతర తగిన ఉద్యోగ అవకాశం కల్పించి ఆ కుటుంబానికి భరోసా కల్పించాలని కోరింది.

ఈ కార్యక్రమంలో చండూరు ఎంపీడీఓ గారు, కనగల్ ఎంపీడీఓ గారు, పలువురు పంచాయతీ కార్యదర్శులు పాల్గొన్నారు.

తోటి ఉద్యోగి కుటుంబానికి అండగా నిలిచిన టీఎన్జీఓఎస్ నల్గొండ జిల్లా సంఘం నాయకత్వం మానవతా దృక్పథాన్ని పలువురు అభినందించారు.

మృతుని ఆత్మకు శాంతి చేకూరాలని, వారి కుటుంబ సభ్యులకు మనోధైర్యాన్ని ప్రసాదించాలని ప్రార్థించారు.