హైకోర్టు సంచలనం.. కోర్టు ఆదేశాలు బేఖాతరు చేసిన రంగారెడ్డి కలెక్టర్‌కు 6 నెలల జైలు శిక్ష!

హైకోర్టు సంచలనం.. కోర్టు ఆదేశాలు బేఖాతరు చేసిన రంగారెడ్డి కలెక్టర్‌కు 6 నెలల జైలు శిక్ష!

హైదరాబాద్: న్యాయస్థానం ఆదేశాలంటే లెక్కలేదా? ప్రజాప్రతినిధులైనా, ఐఏఎస్ అధికారులైనా రాజ్యాంగానికి, చట్టానికి లోబడి పనిచేయాల్సిందేనని తెలంగాణ హైకోర్టు మరోసారి తేల్చిచెప్పింది. కోర్టు ఉత్తర్వులను ఉద్దేశపూర్వకంగా ఉల్లంఘించి, తీవ్ర నిర్లక్ష్యం ప్రదర్శించిన రంగారెడ్డి జిల్లా కలెక్టర్ సి. నారాయణ రెడ్డికి హైకోర్టు 6 నెలల సాధారణ జైలు శిక్ష, ₹2,000 జరిమానా విధిస్తూ అత్యంత సంచలన తీర్పు వెలువరించింది. ఒకవేళ ఈ జరిమానా చెల్లించకపోతే, అదనంగా మరో వారం రోజుల పాటు జైలు శిక్ష అనుభవించాలని జస్టిస్ కె. లక్ష్మణ్ నేతృత్వంలోని ధర్మాసనం స్పష్టం చేసింది.

ఈ సంచలన కేసు యొక్క పూర్తి వివరాలు, లోగుట్లు గూఢచారి న్యూస్ మీకోసం అందిస్తోంది:

అసలు వివాదం ఏమిటి?

రిజిస్ట్రేషన్ చట్టం-1908లోని సెక్షన్ 22-A ప్రకారం నిషేధిత ఆస్తుల జాబితాలో చేర్చిన తమ భూములను (తుర్కయాంజల్ మున్సిపాలిటీ పరిధిలోని మన్నె ముత్యాలమ్మ కుంట వద్ద గల సర్వే నంబర్లు 536, 657, 658) ఆ జాబితా నుండి తొలగించాలని కోరుతూ కొందరు బాధిత భూయజమానులు 2025 ఆగస్టులో హైకోర్టును ఆశ్రయించారు. ఇదే ప్రాంతంలోని పక్క ప్లాట్లను (సర్వే నంబర్ 537) నిషేధిత జాబితా నుండి తొలగించిన అధికారులు, తమ భూముల విషయంలో మాత్రం వివక్ష చూపిస్తున్నారని బాధితులు కోర్టు దృష్టికి తీసుకెళ్లారు.

దీనిపై విచారణ జరిపిన హైకోర్టు.. బాధితుల దరఖాస్తును పరిశీలించి, 60 రోజుల్లోగా తగిన నిర్ణయం తీసుకోవాలని 2025 ఆగస్టులోనే అప్పటి రంగారెడ్డి కలెక్టర్‌ను ఆదేశించింది.

అధికారుల బరితెగింపు.. కోర్టు తీవ్ర ఆగ్రహం

కోర్టు ఇచ్చిన 60 రోజుల గడువు ముగిసినప్పటికీ కలెక్టర్ నారాయణ రెడ్డి నుండి ఎలాంటి స్పందన రాలేదు. అధికారుల నిర్లక్ష్యంతో విసిగిపోయిన బాధితులు.. గతేడాది అక్టోబర్ 15న హైకోర్టులో కోర్టు ధిక్కరణ (Contempt of Court) పిటిషన్ దాఖలు చేశారు. చట్టం తన పని తాను చేసుకుంటూ నోటీసులు జారీ చేసిన తర్వాతే రెవెన్యూ యంత్రాంగంలో కదలిక వచ్చింది.

అయినప్పటికీ, అహంకారపూరితంగా వ్యవహరించిన అధికారులు ఈ ఏడాది ఫిబ్రవరి 26న, ఆ తర్వాత జూలై 8న బాధితుల వినతిని తిరస్కరిస్తూ ఉత్తర్వులు జారీ చేశారు. కోర్టు ఆదేశాలను సకాలంలో అమలు చేయకుండా, ధిక్కరణ పిటిషన్ వేసిన తర్వాత మాత్రమే కాలయాపన చేసి తిరస్కరణకు పూనుకోవడాన్ని ధర్మాసనం తీవ్రంగా తప్పుబట్టింది.

రికార్డులు మాయం.. అఫిడవిట్‌లో అబద్ధాలు!

ఈ కేసు విచారణ సందర్భంగా కలెక్టర్ కోర్టుకు సమర్పించిన వివరణలు చూసి ధర్మాసనం నివ్వెరపోయింది. తాము ఆర్డీఓ (RDO), తహసీల్దార్ల నుండి నివేదికలు తెప్పించుకుని బాధితులతో విచారణ జరిపామని కలెక్టర్ అఫిడవిట్ దాఖలు చేశారు. కానీ, కోర్టు రికార్డులను పరిశీలించగా.. ఫిబ్రవరి 21న జరిగిన సదరు విచారణ పత్రాల్లో ఆర్డీఓ, తహసీల్దార్, ఇతర అధీకృత అధికారుల సంతకాలు ఉండాల్సిన చోట ఖాళీగా ఉన్నాయి!

కోర్టును సైతం తప్పుదోవ పట్టించేలా కలెక్టర్ దాఖలు చేసిన కౌంటర్ అఫిడవిట్‌లోని అంశాలు "పచ్చి అబద్ధం" (Palpably False) అని హైకోర్టు తీవ్ర అభ్యంతరం వ్యక్తం చేసింది. "కోర్టు ఆదేశం రైటా, రాంగా అనేది ధిక్కరణ విచారణలో అనవసరం. ఆదేశం ఏదైనా సరే అధికారులు ఖచ్చితంగా అమలు చేసి తీరాల్సిందే. న్యాయవ్యవస్థ ఆదేశాలను తుంగలో తొక్కితే సహించేది లేదు" అని న్యాయమూర్తి హెచ్చరించారు.

ప్రస్తుత పరిస్థితి ఏంటి?

రంగారెడ్డి కలెక్టర్‌కు 6 నెలల జైలు శిక్ష ఖరారైనప్పటికీ.. ఆయన ఈ తీర్పుపై ఉన్నత ధర్మాసనంలో లేదా సుప్రీంకోర్టులో అప్పీల్ చేసుకునేందుకు వీలుగా శిక్ష అమలును హైకోర్టు 4 వారాల పాటు నిలిపివేసింది (సస్పెండ్ చేసింది).

రాబోయే నాలుగు వారాల్లో కలెక్టర్ పైకోర్టు నుండి స్టే లేదా ఉపశమనం తెచ్చుకోలేకపోతే.. రంగారెడ్డి జిల్లా కలెక్టర్ నారాయణ రెడ్డి కటకటాల పాలు కావడం ఖాయం. ఈ తీర్పు ద్వారా కోర్టు ఆదేశాలను బేఖాతరు చేసే అధికారులకు న్యాయస్థానం గట్టి హెచ్చరిక పంపింది.

ఈ కేసుపై తదుపరి అప్‌డేట్స్ కోసం చూస్తూనే ఉండండి — మీ గూఢచారి న్యూస్ నెట్‌వర్క్.