*ఆదిలాబాద్ జిల్లాలో ఎస్ఐ ఏసీబీ వలలో.. రూ.40 వేలు లంచం తీసుకుంటూ పట్టివేత*

 *ఆదిలాబాద్ జిల్లాలో ఎస్ఐ ఏసీబీ వలలో.. రూ.40 వేలు లంచం తీసుకుంటూ పట్టివేత*

*ఆదిలాబాద్, నవంబర్ 4:* బజార్‌హత్నూర్ పోలీస్ స్టేషన్ సబ్ ఇన్‌స్పెక్టర్ జి. రమేష్ ఏసీబీ వలలో చిక్కాడు. రూ.40,000 లంచం తీసుకుంటూ రెడ్ హ్యాండెడ్‌గా పట్టుబడ్డాడు.

*కేసు వివరాలు:*

ఓ అవివాహిత యువతి ఆత్మహత్య కేసు (BNSS సెక్షన్ 194 కింద నమోదు) లో ఫిర్యాదుదారుడిని ఇరికిస్తానని ఎస్ఐ బెదిరించాడు. మృతురాలు చనిపోయే ముందు చివరి ఫోన్ కాల్ ఫిర్యాదుదారుడికి చేసిందని, దీన్ని అదనుగా చేసుకుని ఎస్ఐ బ్లాక్ మెయిల్ కు దిగాడు.

ఫిర్యాదుదారుడి మొబైల్ ఫోన్‌ను కూడా తన వద్దే ఉంచుకుని, కేసులో ఇరికించకుండా ఉండేందుకు, ఫోన్ తిరిగి ఇచ్చేందుకు మొదట రూ.50,000 డిమాండ్ చేశాడు. ఫిర్యాదుదారుడి అభ్యర్థనతో రూ.40,000కు తగ్గాడు.

ఈరోజు గ్రామ శివారులోని నిర్మాణంలో ఉన్న పెట్రోల్ బంకు వద్దకు ఫిర్యాదుదారుడిని పిలిచి, సెంట్రింగ్ బాక్సుల కింద డబ్బు పెట్టాలని సూచించాడు. ఫిర్యాదుదారుడు డబ్బు పెట్టగానే ఏసీబీ అధికారులు వలపన్ని పట్టుకున్నారు.

నిందితుడిని అరెస్ట్ చేసి కరీంనగర్‌లోని ఏసీబీ కేసుల ప్రత్యేక కోర్టు ముందు హాజరుపరచనున్నారు. ఫిర్యాదుదారుడి వివరాలను భద్రతా కారణాలతో గోప్యంగా ఉంచారు.

*లంచం అడిగితే 1064కు కాల్ చేయండి:* ప్రభుత్వ ఉద్యోగి ఎవరైనా లంచం అడిగితే టోల్ ఫ్రీ నంబర్ 1064కు, వాట్సాప్ 9440446106కు ఫిర్యాదు చేయాలని ఏసీబీ కోరింది.