పరిశ్రమలకు పీసీబీ పచ్చజెండా? చెరువులకు మాత్రం విషజెండా! కొల్లూరు చెరువులోకి కాలుష్య ప్రవాహం.. అధికారుల స్పందన ఎక్కడ?

 

పరిశ్రమలకు పీసీబీ పచ్చజెండా? చెరువులకు మాత్రం విషజెండా!

కొల్లూరు చెరువులోకి కాలుష్య ప్రవాహం.. అధికారుల స్పందన ఎక్కడ?

సంగారెడ్డి (గూఢచారి ప్రతినిధి):

సంగారెడ్డి జిల్లా పరిధిలోని కొల్లూరు చెరువు కాలుష్య కూపంగా మారుతోంది.  నివాస సముదాయాల నుంచి వచ్చే మురుగునీరు చెరువులోకి చేరుతుండటంతో స్థానికులు తీవ్ర ఆందోళన వ్యక్తం చేస్తున్నారు. చెరువు కాలుష్యంపై వరుస ఫిర్యాదులు వెల్లువెత్తుతున్నా కాలుష్య నియంత్రణ మండలి (పీసీబీ) అధికారులు స్పందించకపోవడంపై తీవ్ర విమర్శలు వ్యక్తమవుతున్నాయి.

డబుల్ బెడ్‌రూమ్ ఎస్టీపీ (STP) వైఫల్యం?

కొల్లూరు పరిధిలోని డబుల్ బెడ్‌రూమ్ నివాస సముదాయంలో ఏర్పాటు చేసిన మురుగునీటి శుద్ధి కేంద్రం (STP) సక్రమంగా పనిచేయడం లేదని స్థానికులు ఆరోపిస్తున్నారు.

 * ఎస్టీపీ పనిచేస్తుంటే శుద్ధి చేసిన మురుగునీరు ఎక్కడికి వెళ్తోంది?

 * ఒకవేళ ఎస్టీపీ నిరుపయోగంగా మారితే అధికారులు ఇప్పటివరకు ఎందుకు చర్యలు తీసుకోలేదు?

అనే ప్రశ్నలకు సమాధానం చెప్పాల్సిన బాధ్యత సంబంధిత అధికారులపైనే ఉందని బాధితులు నిలదీస్తున్నారు.

అపార్ట్‌మెంట్లు, గేటెడ్ కమ్యూనిటీల ఇష్టారాజ్యం

కొల్లూరు–రామచంద్రాపురం పరిధిలోని పలు నివాస సముదాయాలు, గేటెడ్ కమ్యూనిటీల ఎస్టీపీల నిర్వహణపైనా తీవ్ర అభ్యంతరాలు వ్యక్తమవుతున్నాయి. కొన్ని చోట్ల ఎస్టీపీలను నిర్వహించకుండా రాత్రికి రాత్రే మురుగునీటిని నేరుగా బయటకు వదులుతున్నట్లు అభియోగాలు ఉన్నాయి.

ఈ వ్యవహారంపై పీసీబీ ఇప్పటివరకు ఎన్ని తనిఖీలు నిర్వహించింది? ఎన్ని నీటి నమూనాలు సేకరించింది? ఎవరికి నోటీసులు జారీ చేసిందో స్పష్టం చేయాలని స్థానికులు డిమాండ్ చేస్తున్నారు.

ద్వంద్వ నీతిపై నిలదీత

పరిశ్రమల కాలుష్యంపై ఫిర్యాదులు వస్తే  అధికారులకు పండుగే, తక్షణమే తనిఖీలు చేసి నోటీసులు ఇచ్చే అధికారులు, నివాస సముదాయాల నుంచి వచ్చే వ్యర్థాలపై ఎందుకు మౌనం వహిస్తున్నారని ప్రజలు ప్రశ్నిస్తున్నారు. నెల రోజుల క్రితమే లిఖితపూర్వకంగా ఫిర్యాదు చేసినా, దినపత్రికల్లో వార్తలు ప్రచురితమైనా అధికారుల్లో కదలిక లేకపోవడం గమనార్హం. జోనల్ అధికారులు, బోర్డు అధికారులు లెటర్ ఫార్వర్డ్ చేశామా, చేతులు దులుపుకున్నామా అన్న చందంగా వ్యవహరిస్తున్నారు.

చెరువు విషతుల్యమైతే తీవ్ర నష్టం

చెరువు నీరు కలుషితమైతే దాని ప్రభావం పరిసర ప్రాంతాల  భూగర్భ జలాలపై తీవ్రంగా పడనుంది. బోరు బావుల నీరు విషపూరితంగా మారే ప్రమాదం ఉందని పర్యావరణవేత్తలు హెచ్చరిస్తున్నారు.

ప్రజల ప్రధాన డిమాండ్లు:

 * నీటి నమూనాల పరీక్ష: కొల్లూరు చెరువుతో పాటు పరిసర ప్రాంతాల భూగర్భ జలాల నమూనాలను తక్షణమే ల్యాబ్‌లో పరీక్షించాలి.

 * సమగ్ర తనిఖీలు: డబుల్ బెడ్‌రూమ్ కాంప్లెక్స్, రామచంద్రాపురం పరిధిలోని అన్ని అపార్ట్‌మెంట్లు, గేటెడ్ కమ్యూనిటీల ఎస్టీపీలను క్షేత్రస్థాయిలో పరిశీలించాలి.

 * కఠిన చర్యలు: మురుగునీటి ప్రవాహ మార్గాలను గుర్తించి, నిబంధనలు ఉల్లంఘించిన వారిపై చట్టప్రకారం కఠిన చర్యలు తీసుకోవాలి.

 * పారదర్శకత: ఇప్పటివరకు వచ్చిన ఫిర్యాదులపై తీసుకున్న చర్యల వివరాలను బహిర్గతం చేయాలి.

"కొల్లూరు చెరువు ప్రజల ఆస్తి.. కాలుష్యానికి డంపింగ్ యార్డు కాదు!"

పీసీబీ అధికారులు ఇప్పటికైనా స్పందించి చర్యలు చేపడతారా? లేక 'గూఢచారి' మరిన్ని ఆధారాలతో ఎండగడుతుందా? వేచి చూడాల్సిందే!