హైదరాబాద్‌లో ఫుడ్ సేఫ్టీ అధికారుల మెరుపు దాడులు: తాజ్ ఫలక్‌నుమా, మెహఫిల్ సహా 22 ప్రముఖ రెస్టారెంట్లపై చర్యలు, 14 హోటళ్లు బంద్!

 హైదరాబాద్‌లో ఫుడ్ సేఫ్టీ అధికారుల మెరుపు దాడులు: తాజ్ ఫలక్‌నుమా, మెహఫిల్ సహా 22 ప్రముఖ రెస్టారెంట్లపై చర్యలు, 14 హోటళ్లు బంద్!

హైదరాబాద్:

నగరంలోని బిర్యానీ, కబాబ్స్ మరియు వెజ్ టిఫిన్స్ ప్రియులకు తెలంగాణ ఆహార భద్రతా విభాగం (TG SAFE) షాకింగ్ వార్త అందించింది. భాగ్యనగరంలో ప్రముఖ హోటళ్లు, రెస్టారెంట్లలో ఆహార నాణ్యత ఏ విధంగా ఉందో బయటపెడుతూ అధికారులు శనివారం (అక్టోబర్ 31, 2026) భారీ ఎత్తున తనిఖీలు నిర్వహించారు. గోల్కొండ, చార్మినార్ జోన్ల పరిధిలోని 22 ప్రముఖ రెస్టారెంట్లలో 22 ప్రత్యేక ఎన్‌ఫోర్స్‌మెంట్ బృందాలు ఈ సోదాలు చేపట్టాయి.

ఈ తనిఖీల్లో విస్తుపోయే నిజాలు బయటపడ్డాయి. కిచెన్లలో బొద్దింకలు, ఈగల ముప్పు, కుళ్ళిన మరియు బూజు పట్టిన కూరగాయలు, గడువు ముగిసిన పదార్థాలు నిల్వ ఉంచడం అధికారులను విస్మయానికి గురిచేసింది. వీటన్నింటికీ మించి వెజ్ (శాకాహార) పదార్థాలతో కలిపి పచ్చి మాంసాన్ని ఫ్రిజ్‌లలో స్టోర్ చేయడం, కిచెన్ గోడలు మురికిగా ఉండటం, వాడిన వంట నూనెనే పదే పదే వాడటం వంటి తీవ్రమైన ఉల్లంఘనలను అధికారులు గుర్తించారు.

544 కిలోల కలుషిత మాంసం ధ్వంసం:

ఈ దాడుల్లో భాగంగా దాదాపు 544 కిలోల కుళ్ళిన, కలుషితమైన మాంసాన్ని, 13 కిలోల వాడిన వంట నూనెను అధికారులు స్వాధీనం చేసుకుని అక్కడికక్కడే పారవేయించారు. అలాగే, కల్తీ జరిగిందనే అనుమానంతో 21 రకాల ఆహార నమూనాలను సేకరించి ల్యాబ్ పరీక్షల నిమిత్తం ల్యాబొరేటరీకి పంపారు.

14 రెస్టారెంట్ల లైసెన్సులు రద్దు – వ్యాపారాలు బంద్:

తీవ్రమైన ఆహార భద్రతా నియమాలను ఉల్లంఘించినందుకు గాను కింద పేర్కొన్న 14 ప్రముఖ సంస్థల FSSAI లైసెన్సులను అధికారులు తక్షణమే సస్పెండ్ చేశారు. వీటిని వెంటనే మూసివేయాలని, తదుపరి ఆదేశాలు వచ్చే వరకు ఎలాంటి వ్యాపార కార్యకలాపాలు సాగించకూడదని ఆదేశించారు.

1. హోటల్ నయాబ్ (నయాపూల్)

2. షా ఘౌస్ కేఫ్ / రెస్టారెంట్ (షాలిబండ)

3. డైన్ హిల్ రెస్టారెంట్

4. సోహైల్ రెస్టారెంట్

5. అజీబో ది రాయల్ అరేబియన్ రెస్టారెంట్

6. హోటల్ శ్రీ రాఘవేంద్ర ఉడుపి వెజ్ (తోలిచౌకి)

7. హోటల్ శ్రీ రాఘవేంద్ర ఉడుపి వెజ్ (సంతోష్ నగర్)

8. లక్కీ రెస్టారెంట్ (సంతోష్ నగర్)

9. శ్రీ బాలాజీ ఫ్యామిలీ డాబా (గుడిమల్కాపూర్)

10. సిద్దిక్ కబాబ్ సెంట్రల్ కిచెన్ (గుడిమల్కాపూర్)

11. అల్సబా హోటల్ (తోలిచౌకి)

12. మెహఫిల్ రెస్టారెంట్ (దిల్‌సుఖ్‌నగర్)

13. హోటల్ అక్షయ టిఫిన్స్ (మలక్‌పేట్)

14. హోటల్ వెంకటేశ్వర (ఎంజెఆర్ రోడ్)

తాజ్ ఫలక్‌నుమా, పిస్టా హౌస్ సహా 8 హోటళ్లకు షోకాజ్ నోటీసులు:

కేవలం సాధారణ హోటళ్లే కాకుండా, నగరంలోని అత్యంత విలాసవంతమైన 7-స్టార్ హోటల్ అయిన తాజ్ ఫలక్‌నుమా ప్యాలెస్ కిచెన్‌లోనూ లోపాలు ఉన్నట్లు అధికారులు గుర్తించారు. లోపాలను సరిదిద్దుకోవాలని హెచ్చరిస్తూ కింది 8 సంస్థలకు షోకాజ్ నోటీసులు జారీ చేశారు. వీటికి భారీ జరిమానాలతో పాటు తదుపరి చర్యలు ఉంటాయని అధికారులు స్పష్టం చేశారు.

• తాజ్ ఫలక్‌నుమా ప్యాలెస్

• హోటల్ సబ్జీ (చార్మినార్)

• పిస్టా హౌస్ రెస్టారెంట్ (షాఅలీబండ)

• స్వీకార్ హోటల్ (సంతోష్ నగర్)

• మండి అట్ 36 అరేబియన్ కిచెన్ (చార్మినార్)

• గోల్కొండ హోటల్ అండ్ రిసార్ట్స్ (మాసాబ్ ట్యాంక్)

• ఇంపీరియల్ మల్టీక్యూజిన్ రెస్టారెంట్ (తోలిచౌకి)

• తైబా బేకరీ (లక్డీకాపూల్)

ఆన్‌లైన్ ఫుడ్ డెలివరీ యాప్స్ (స్విగ్గీ, జోమాటో) ద్వారా ఆర్డర్ చేసుకునే వారు, బయట రెస్టారెంట్లలో ఇష్టంగా తినే హైదరాబాదీ భోజన ప్రియులు ఇకనైనా అలర్ట్‌గా ఉండాలని, పరిశుభ్రత పాటించని హోటళ్లపై అధికారులకు ఫిర్యాదు చేయాలని 'TG

 SAFE' అధికారులు సూచిస్తున్నారు.