*భైంసా మున్సిపల్ కమిషనర్ ఏసీబీ వలలో.. రూ.50 వేల లంచం తీసుకుంటూ పట్టివేత*

 *భైంసా మున్సిపల్ కమిషనర్ ఏసీబీ వలలో.. రూ.50 వేల లంచం తీసుకుంటూ పట్టివేత*

*హైదరాబాద్, నవంబరు 10:* భైంసా మున్సిపాలిటీ ఇన్‌చార్జ్ మున్సిపల్ కమిషనర్ ఏసీబీ వలలో చిక్కాడు.

భైంసా మున్సిపాలిటీలో డిప్యూటీ ఎగ్జిక్యూటివ్ ఇంజినీర్‌గా, ఇన్‌చార్జ్ మున్సిపల్ కమిషనర్‌గా పనిచేస్తున్న *జాదవ్ సంతోష్* ను ఆదిలాబాద్ రేంజ్ ఏసీబీ అధికారులు రూ.50,000 లంచం తీసుకుంటూ రెడ్ హ్యాండెడ్‌గా పట్టుకున్నారు.

*బిల్లు కోసం లంచం:*

ఫిర్యాదుదారుడు భైంసా మున్సిపాలిటీలో చేసిన సివిల్ పనులకు సంబంధించి పెండింగ్‌లో ఉన్న రూ.2,63,128 చెల్లింపు చెక్కును విడుదల చేయడానికి కమిషనర్ రూ.50,000 డిమాండ్ చేశాడు.

అంతకుముందు అక్టోబర్ 26న కూడా రూ.10,000 లంచం తీసుకుని రూ.6,40,000 చెక్కును విడుదల చేశాడు. మిగిలిన రూ.2,63,128 చెల్లింపు కోసం మళ్లీ రూ.50,000 డిమాండ్ చేయడంతో ఫిర్యాదుదారుడు ఏసీబీని ఆశ్రయించాడు.

ఫిర్యాదు మేరకు వలపన్నిన ఏసీబీ అధికారులు లంచం సొమ్ము రూ.50,000ను నిందితుడి కారు డ్యాష్‌బోర్డు నుంచి స్వాధీనం చేసుకున్నారు. డ్యాష్‌బోర్డు స్వాబ్స్ కెమికల్ టెస్ట్‌లో పాజిటివ్‌గా తేలాయి.

అధికార పదవిని దుర్వినియోగం చేసి అక్రమ ప్రయోజనం పొందేందుకు ప్రయత్నించినట్లు ఏసీబీ తెలిపింది.

నిందితుడిని అరెస్ట్ చేసి కరీంనగర్‌లోని ఏసీబీ కేసుల ప్రత్యేక కోర్టు ముందు హాజరుపరచనున్నారు. కేసు విచారణలో ఉంది. ఫిర్యాదుదారుడి వివరాలను భద్రతా కారణాలతో గోప్యంగా ఉంచారు.

*లంచం అడిగితే 1064కు కాల్ చేయండి:* ప్రభుత్వ ఉద్యోగి ఎవరైనా లంచం అడిగితే టోల్ ఫ్రీ నంబర్ 1064కు, వాట్సాప్ 9440446106కు ఫిర్యాదు చేయాలని ఏసీబీ కోరింది.