నిర్మాణ ప్రాజెక్టులపై ఉక్కుపాదం.. మరి కొల్లూరు పెద్ద చెరువుపై ఎందుకీ నిర్లక్ష్యం?

 నిర్మాణ ప్రాజెక్టులపై ఉక్కుపాదం.. మరి కొల్లూరు పెద్ద చెరువుపై ఎందుకీ నిర్లక్ష్యం?

నిర్మాణ ప్రాజెక్టులు కాసులు రాలుస్తాయా? చెరువులు ప్రకృతి సంపదను కాపాడే పర్యావరణ వ్యవస్థలు కదా!

16 ప్రాజెక్టులపై సమీక్ష.. ఐదు నిర్మాణ ప్రాజెక్టులు, ఒక ఆర్ఎంసీ ప్లాంట్ మూసివేతకు సిఫారసు.. మరి చెరువు కాలుష్యంపై చర్యలేవీ?

కొల్లూరు: సంగారెడ్డి జిల్లా తెల్లాపూర్‌, కొల్లూరు పరిసరాల్లో నిర్మాణ ప్రాజెక్టుల నుంచి వెలువడుతున్న దుమ్ము, ధూళితో వాయు కాలుష్యం పెరుగుతోందన్న ఫిర్యాదులపై తెలంగాణ కాలుష్య నియంత్రణ మండలి (టీజీపీసీబీ) స్పందించడం అభినందనీయమే. 16 నిర్మాణ ప్రాజెక్టులపై సమీక్ష నిర్వహించి, తీవ్రమైన ఉల్లంఘనలు గుర్తించిన ఐదు నిర్మాణ ప్రాజెక్టులు, ఒక రెడీ మిక్స్ కాంక్రీట్ (ఆర్ఎంసీ) ప్లాంట్‌ను మూసివేయాలని టాస్క్‌ఫోర్స్ కమిటీ సిఫారసు చేయడం మంచి పరిణామం.

అయితే ఇదే చిత్తశుద్ధి కొల్లూరు పెద్ద చెరువు విషయంలో ఎందుకు కనిపించడం లేదన్న ప్రశ్నలు వ్యక్తమవుతున్నాయి.

చెరువు కాలుష్యంపై అధికారుల మౌనం ఎందుకు?

కొల్లూరు పెద్ద చెరువులోకి వ్యర్థాలు చేరుతున్నాయని, నీరు కలుషితమవుతోందని వివిధ దినపత్రికల్లో వార్తలు ప్రచురితమయ్యాయి. స్థానిక ప్రజల నుంచి కూడా టీజీపీసీబీ అధికారులకు ఫిర్యాదులు అందాయి. అయినప్పటికీ సంబంధిత రీజినల్ ఆఫీస్ అధికారుల్లో ఆశించిన స్థాయిలో స్పందన కనిపించడం లేదన్న విమర్శలు వినిపిస్తున్నాయి.

చెరువులోకి చేరుతున్న వ్యర్థాల స్వభావం ఏమిటి? అవి ఎక్కడి నుంచి వస్తున్నాయి? నీటి నమూనాలు సేకరించి పరీక్షించారా? కాలుష్యానికి కారణమైన వారిని గుర్తించారా? అనే ప్రశ్నలకు అధికారులు సమాధానం చెప్పాలి.

చెరువుల్లోకి చేరే  వ్యర్థాలు, మురుగునీటిలోని కాలుష్య కారకాలు భూగర్భ జలాల్లోకి కూడా చేరే ప్రమాదం ఉంది. ఫలితంగా బోర్లు, బావుల నీరు కలుషితమై ప్రజల ఆరోగ్యానికి తీవ్ర ముప్పు ఏర్పడవచ్చు. జలచరాల మనుగడ, జీవవైవిధ్యం, ప్రకృతి సమతుల్యత కూడా దెబ్బతింటాయి. అందుకే ఇది కేవలం చెరువు సమస్య కాదు.. పర్యావరణం, భూగర్భ జలాలు, ప్రజారోగ్యానికి సంబంధించిన తీవ్రమైన అంశం.

కాసులు రాల్చే ప్రాజెక్టులకే ప్రాధాన్యమా?

నిర్మాణ ప్రాజెక్టులపై ప్రత్యేక బృందాలతో తనిఖీలు నిర్వహిస్తున్న అధికారులు, చెరువులో వ్యర్థాలు కలుస్తున్నాయన్న ఫిర్యాదులపై కూడా అదే స్థాయిలో స్పందించాలి కదా! కొల్లూరు పెద్ద చెరువులోకి వ్యర్థాలు చేరుతున్నాయన్న ఫిర్యాదులపై క్షేత్రస్థాయి తనిఖీలు ఎందుకు నిర్వహించడం లేదు? చెరువు నీటితోపాటు పరిసర ప్రాంతాల్లోని భూగర్భ జలాల నమూనాలను ఎందుకు పరీక్షించడం లేదు?

నిర్మాణ ప్రాజెక్టులపై చర్యలు తీసుకుంటే వాటి యాజమాన్యాలకు ఆర్థిక నష్టం కలగవచ్చు. కానీ చెరువులు కలుషితమైతే ప్రకృతి, జీవవైవిధ్యం, భూగర్భ జలాలు, ప్రజారోగ్యంపై దీర్ఘకాలిక ప్రభావం పడుతుంది.

చెరువులు కాసులు రాల్చకపోవచ్చు.. కానీ ప్రకృతి సమతుల్యతకు ప్రాణాధారాలు!

టీజీపీసీబీ ఉన్నతాధికారులు కొల్లూరు పెద్ద చెరువు విషయంలో ప్రత్యేక తనిఖీ బృందాన్ని పంపించి, నీటి నమూనాలతోపాటు భూగర్భ జలాల నమూనాలను కూడా పరీక్షించాలి. కాలుష్యానికి కారణమవుతున్న వనరులను గుర్తించి బాధ్యులపై చట్టపరమైన చర్యలు తీసుకోవాలి.

నిర్మాణ ప్రాజెక్టులపై చూపుతున్న కఠినత్వం సహజ జలవనరుల పరిరక్షణలోనూ కనిపించాలి.

నిర్మాణ ప్రాజెక్టులు కాసులు రాలుస్తాయేమో.. చెరువులు కాసులు రాల్చకపోవచ్చు! కానీ అవి ప్రకృతి సమతుల్యతకు ప్రాణాధారాలు.. జీవవైవిధ్యానికి నిలయాలు.. భూగర్భ జలాల పరిరక్షణకు కీలక వనరులు. మరి అధికారులకు కాసులు కురిపించే ప్రాజెక్టులే ముఖ్యమా? ప్రకృతి సంపదను, పర్యావరణాన్ని కాపాడటం ముఖ్యం కాదా?

ఈ ప్రశ్నలకు టీజీపీసీబీ అధికార్లు సమాధానం చెప్పాలి. కొల్లూరు పెద్ద చెరువు పరిరక్షణకు తక్షణ చర్యలు తీసుకోవాలని ప్రజలు డిమాండ్ చేస్తున్నారు.